आमगाव : कृषी उत्पन्न बाजार समिती आमगावच्या निवडणुकीत भाजपा व राका युतीच्या आमगाव विकास पॅनलने काँग्रेस समर्थित किसान विकास परिवर्तन पॅनलचा १४ विरुद्ध ४ अशा मताधिक्याने पराभव केला आहे. अठरा जागा साठी झालेल्या निवडणुकीची आज २९ एप्रिलला मतमोजणी करण्यात आली.आमगाव विकास पॅनलचे सेवा सहकारी मतदार संघ सर्वसाधारण गटातून केशवराव मानकर, संजय नागपुरे, टीकाराम मेंढे, राजेश भक्तवर्ती, अनिल शर्मा विजयी झाले तर महिला गटातून चिंतनबाई तुरकर व शशिकला दोनोडे, इतर मागासवर्ग गटातून युवराज बिसेन व भटक्या विमुक्त जाती गटामधून विनोद कन्नमवार यांचा विजय झाला. ग्रामपंचायत मतदार संघ सर्वसाधारण गटातून गणेश हर्षे, अनुसूचित जाती-जमाती गटातून उत्तम नंदेश्वर, व्यापारी व अडते मतदार संघातून सचिन अग्रवाल व सोमेश असाटी आणि हमाल व तोलारी मतदारसंघातून महेश चूटे विजयी झाले आहेत. काँग्रेस समर्थित किसान विकास परिवर्तन पॅनलचे फक्त चार संचालक निवडून आले. यात सेवा सहकारी सर्वसाधारण गटातून भूपेश अग्रवाल, हुकुमचंद बोहरे आणि ग्रामपंचायत गटातून संजय बहेकार व महेश उके विजयी झाले आहेत.