🏫🏫भिडेवाड्याचा महापालिकेने घेतला ताबा📖📖

 🏫🏫भिडेवाड्याचा महापालिकेने घेतला ताबा📖📖

बात्मी संकलन (सुमित ठाकरे )

पुणे : अज्ञानरूपी अंधार दूर करण्यासाठी महात्मा जोतिबा फुले आणि क्रांतिज्योती सावित्रीबाई फुले यांनी १ जानेवारी १८४८ रोजी बुधवार पेठेतील भिडेवाड्यात देशातील पहिली मुलींची शाळा सुरू केली होती. हाच भिडेवाडा राष्ट्रीय स्मारक व्हावा यासाठी लढा दिला जात होता. तब्बल १३ वर्षांच्या न्यायालयीन लढ्यानंतर हा मार्ग सुकर झाला आणि सोमवारी (दि. ४) रात्री मोठ्या पोलिस बंदोबस्तात भिडेवाड्याचा ताबा महापालिकेने घेतला आहे.सर्वोच्च न्यायालयाच्या आदेशानुसार पुणे महापालिकेने भिडेवाड्याच्या जागेचा मालक आणि भाडेकरूंना नोटीस देऊन पंचनामा केला. सोमवारी रात्री उशिरा महापालिकेने कडेकोट पोलिस बंदोबस्तात या वाड्यातील जागेचा प्रत्यक्ष ताबा घेतला. या जागेचे भूसंपादन करण्यात महापालिकेला अखेर यश आले आहे.फुले दाम्पत्याच्या कार्याला खऱ्या अर्थाने अभिवादन करण्यासाठी आणि त्यांच्या आठवणी जपण्यासाठी म्हणून भिडेवाडा हा राष्ट्रीय स्मारक झाले पाहिजे, अशी मागणी गेल्या अनेक वर्षांपासून होत आहे. गेली १३ वर्षे न्यायालयीन लढा सुरू होता. भिडेवाड्याची जागा एका महिन्यात म्हणजे ३ डिसेंबरपर्यंत महापालिकेच्या ताब्यात द्यावी, असे आदेश सर्वोच्च न्यायालयाने जागा मालक आणि भाडेकरूंना दिले होते. त्यानुसार पुणे महापालिकेच्या भूसंपादन विभागाने सोमवारी दुपारी भिडेवाडा येथे जाऊन जागा मालक आणि भाडेकरू यांना नोटीस देऊन पंचनामा केला; पण तेथील बहुतांश ठिकाणची दुकाने बंद होती. त्यामुळे नोटीस देता आली नाही. त्यानुसार प्रशासनाने पंचनामा करून घेतला आहे.